Jón Magnús Pétursson fæddist á Akureyri 1930, hann byrjaði að leika á munnhörpu aðeins fimm ára gamall og var farinn að læra á orgel sjö ára gamall, við fimmtán ára aldur tók píanóið við og varð hans aðalhljóðfæri. Eftir stúdentspróf frá MA, þar sem Magnús lék á píanó og trommur (eða trumbu eins og það var kallað) með skólahljómsveitinni sem þá starfaði við skólann, lá leið hans suður í nám við Tónlistarskólann í Reykjavík. Á Akureyri lék hann einnig leikið með Hljómsveit Jóns Sigurðssonar (trompetleikara) sem var samtíða honum í MA.
Magnús lék með fjölda hljómsveita t.a.m. með hljómsveitum Eyþórs Þorlákssonar, Stefáns Þorleifssonar og Jan Morávek áður en hann fór til Akureyrar sumarið 1950 til að gerast píanóleikari á Hótel Norðurlandi. Eftir það lék hann með fjölmörgum hljómsveitum, s.s. Þ.Ó. kvintettnum, Hljómsveit Carls Billich, Kvintett Gunnars Ormslev og síðan Hljómsveit Björns R. Einarssonar .. Með Hljómsveit Björns R. Einarssonar starfaði Magnús í nokkur ár en árið 1957 með tríói Hrafns Pálssonar áður en hann hóf að leika með NEO-tríóinu sem einnig starfaði heillengi eða til hausts 1963 þegar sú sveit var lögð niður, Magnús stofnaði þá eigið tríó upp úr því sem starfaði um stuttan tíma, aukinheldur starfrækti Magnús sjálfur hljómsveitir um lengri og skemmri tíma á sjöunda áratugnum. Hann hætti spilamennsku á dansleikjum í kringum 1968, var um tíma með Hljómsveit Hauks Morthens.
Magnús var flestum kunnur fyrir að vera píanóleikari og aðstoðarmaður Valdimars Örnólfssonar við Morgunleikfimi útvarpsins en þátturinn naut mikilla vinsælda á sínum tíma. Magnús lék á fjölda hljómskífa og árið 1954 var hann í fyrsta sinn með eigin sveit sem lék undir söng Leikbræðra, Gests Þorgrímssonar og Öskubuskna á nokkrum 78 snúninga plötum. Og hann lék með fleiri sveitum sem léku inn á plötur á þeim tíma, t.d. með B.G. kvintettnum sem var einhvers konar angi af hljómsveit Björns R. Einarssonar, og lék á plötu Öddu Örnólfs. Síðar lék hann með t.d. Helenu Eyjólfsdóttur, Birni R. Einarssyni, Alfreð Clausen og Friðbirni G. Jónssyni, og lék einnig einn síns liðs undir hjá Leikhúskvartettnum, Bessa Bjarnasyni og Sólskinskórnum á plötum. Magnús lék aukinheldur á plötum tengdum leiklistinni og hér má nefna plöturnar Saumastofan, Revíuvísur og Jólin hennar ömmu. Einnig fjórar plötur sem hljómsveit hans sendi frá sér undir yfirskriftinni Boðið upp í dans, í samstarfi við Dansskóla Hermanns Ragnars Stefánssonar í kringum 1960 en Magnús var í mörg ár undirleikari við danskennslu og sýningar. Magnús lék á píanóið í Braggablús Magnúsar Eiríkssonar á plötu Mannakorna, Í gegnum tíðina sem kom út 1977.
Magnús kenndi viðtónlistarskóla FÍH sem stofnaður var um áramótin 1956-57. Hann lauk tónmenntakennaraprófi. haustið 1963 hóf hann að kenna söng og tónmennt við Melaskóla og starfaði þar í mörg ár. Þar setti hann á svið með börnunum frumsamda söngleiki, stjórnaði kórum og setti m.a. á stofn Sólskinskórinn, og þar var einnig að finna barnastjörnuna Hönnu Valdísi Guðmundsdóttur sem Magnús útsetti fyrir og stjórnaði hljómsveit á plötum hennar. Magnús kenndi við Almenna músíkskólann auk þess að sinna einkakennslu í tónlist.
Um 1950 hóf Magnús að leika undir á leiksýningum en hann átti eftir að starfa mikið við slíkt, bæði við revíur og leikrit einkum í samstarfi við LR. Hann samdi tónlist og söngleiki sem fyrr en nefnt, t.d. fyrir börn - og reyndar var slíkt fastur liður í jóladagskrá Ríkisútvarpsins.Magnús samdi líka annars konar tónlist og var lengi virkur í sönglagakeppnum SKT , þar vann hann stundum til verðlauna sem og í fleiri samkeppnum. Meðal laga sem Magnús samdi má nefna Vals moderato sem Elsa Sigfúss söng inn á plötu á sínum tíma, Vorið er komið í flutningi Hauks Morthens og Köttur og mús á plötu Grettis Björnssonar Hann samdi ennfremur lög fyrir Bessa Bjarnason og Sólskinskórinn og reyndar texta einnig en fjöldi texta liggja eftir hann.
Heimildir úr Glatkistunni